Mkulu wa bungwe la Consumers Association of Malawi (CAMA), a John Kapito wauza boma kuti lichite changu kuthetsa vuto lakusowa kwa mafuta a galimoto ndi gasi m’dziko muno.
Polankhula lero pa msonkhano wa atolankhani ku Blantyre a John Kapito ati nzodandaulitsa kuti msika wa mafuta a galimoto wachinyengo (black market) ukukula mdziko muno.
A Kapito ati boma lithetse msikawu popereka ziphaso ku kampani zambiri kuti zizibweretsa mafuta a galimoto mdziko muno.
Mkulu wa CAMA yu wati ndizodandaulitsa kuti anthu akugona ku malo omwetsera mafuta ndipo ena akukakamizika kugula pa mtengo wa K15,000 pa lita.
Iwo ati boma lisiye kupereka ndalama za kunja (forex), kuti anthu adzigula galimoto ndi kuti ndalamazo agwiritse ntchito kugulira mafuta a galimoto.
A Kapito omwe anali limodzi ndi akuluakulu a kampani yogulitsa gasi ya Gasman pa msonkhanowu apempha boma kuti kwapano boma ilole kampani zogulitsa gasi kuti zidzigulitsa pamtengo umene angafune.
Akuluakuluwa ati izi zitha kuthandiza kuti gasi apezeke mosavuta m’dziko muno pano pomwe wakhala akusowa kwa pafupifupi miyezi itatu tsopano.
A Mark Wheeler aku Gasman ati vuto la gasi lakula chifukwa chakusowa kwa ndalama zakunja.
“Ku South Africa komwe timagula gasi alipo ochuluka chomwe chikuvuta ndikusowa kwa ndalama zakunja,” anatero Wheeler.
Mkuluyu watinso bungwe la Malawi Energy Regulatory Authority (MERA) ilole ma kampani kumagulitsa gasi pa mitengo yosiyanasiyana.
“Tikanakonda MERA isiye kaye kukakamiza kuti tizigulitsa pa mtengo umodzi,” watelo Wheeler.
Pomaliza a John Kapito anati kulekelera mavutowa zipangitsa kuti kampani zina azitseke zomwe zipangitse kuti anthu ena akhale pa ulova m’dziko muno.
About the Author
