Ku Lilongwe apolisi ya Kanengo amanga a Collins Chibwana a zaka 53 woyendetsa galimoto ya 3-tonne Daihatsu nambala yake KU 700, kaamba koganiziridwa kuti anathyola Kampani ya Chaser Construction ku Area 28 pofuna kuba zitsulo.
Malingana ndi wachiwiri kwa m’neneri wa Kanengo Polisi Sub Inspector Linly Mwale apolisi amanga a Chibwana Lamulungu pa 04 September 2026.
Iwo ati malipoti akusonyeza kuti anthu anayi anafika ndima crowbars ndi zida zina zothyolera, ndipo anakwanitsa kuthyola gate ndikulowa ku Kampaniko
Sub Inspector Mwale wati anthuwa omwe analipo anayi anayamba kusanja zitsulo mu galimoto ya 3-tonne Daihatsu nambala yake KU 700.
Iye wati apolisi atafika anakwanitsa kugwira dalaivala wa galimoto yi pomwe anthu ena atatu anathawa.
Sub Inspector Linly Mwale watsindika kuti kafukufuku ali mkati kuti agwire anzawo a Chibwana omwe anathawa.
Katundu amene anthuwa ankafuna kuba ndi wa ndalama pafupifupi K10 million.
About the Author
